સુગંધનું સરનામું:
જીવનનું, સમાજનું કોઈ પણ અંગ હોય- ધર્મ, રાજકારણ, કલા, સાહિત્ય, શિક્ષણ, તબીબી, ઇજનેરી કે રમતગમત, પત્રકારત્વ, વ્યવસાય કે અન્ય કોઈ પણ, મહિલાઓ ક્યાંય કશેય પાછળ રહી નથી. પાછી પડી નથી. પોતપોતાના મનગમતા ક્ષેત્રમાં આગવું કામ કરનાર કે નામ કમાનાર આવી અનેક મહિલાઓ વિષે આપણે જાણીએ છીએ, એમનો આદર કરીએ છીએ અને એમના માટે ગૌરવ અનુભવીએ છીએ.
પણ આપણી જ આસપાસ રહેતી, દેખાતી એવી અનેક સાધારણ ગણાતી મહિલાઓ જે કશુંક અસાધારણ કરી રહી છે, કરી શકી છે એમના વિષે આપણે શું જાણીએ છીએ? દેશના કે વિશ્વના પૃષ્ઠો પર ઝળહળી શકવાની કે એ કક્ષાના કામ કરી શકવાની ક્ષમતા કે ભાગ્ય સૌને ફાળે નથી આવતાં,પરંતુ પોતાની જાતને, આસપાસના લોકોને, કુટુંબને કે સમાજના કોઈ એક નાનકડા ભાગને પણ પોતાની ક્ષમતા મુજબ ઉજાળી શકતી સામાન્ય ગણાતી મહિલાઓ આપણી આસપાસ, આપણા કુટુંબમાં,કે પાડોશમાં ક્યાંક ને ક્યાંક જોવા મળે જ છે.
એવાં થોડાં વિશિષ્ટ વ્યક્તિત્વોને ઓળખી એમને ઝળહળને સહુ સાથે વહેંચવાનોઅવસર હાથવગો છે જ તો જવા કેમ દેવાય? આવાં થોડાક લોકોની ઓળખને અજવાળામાં લાવીએ તો એમ બને કે કદાચ કોઈને કશીક મદદ મળે, કોઈકને કશોક સાથ. કોઈકને મળે કશોક સધિયારો અને કશું નહીં તો આપણા જેવા કોઈને મળે કશી પ્રેરણા પોતાની માર્યાદિત ક્ષમતા કે સંજોગોને અતિક્રમીને મૂઠી ઊંચેરું જીવન જીવતી આવી મહિલાઓનું ગૌરવ આપણે જ કરીએ તો? મહિલા દિનની ઉજવણી આનાથી રૂડી કઈ રીતે હોઈ શકે?
શક્તિસ્વરૂપા તો આપણે છીએ જ. પણ ક્યાંક ખૂણે ખાંચરે સંતાયેલી આવી શક્તિઓને ઓળખીને બિરદાવીએ, એમની ખુમારીને ઉજવીએ કે બને તો એમના કાર્યયજ્ઞમાં ક્યાંક આંગળી અડાડીએ તો આપણે માટે મહિલાદિનની ઉજવણી બિલકુલ સાર્થક!
